چلی گل
ٹوٹا نمر 5
لخت عبدالوہاب رحمانی
ماڑے مکھن نیو لالا اج کیہ بار آ۔منگلار آ کیہ بدھار آ۔
نغے نی اے اج بیروار آ۔اج شامی ناں سدّا وی آ ۔سلیم لالے ناں سلانا آ جے۔تو کی کیہ کھڑک پپٸ گٸی باریں انتاریں نی .
ماڑا پتر پچھلے جویں وی نہ سا ناں آیا آخنا سا اس باریں اشساں۔انتاریں نی آخنا سا ددّے تساں کی ھڈیاں والے ڈاکٹر کول کھڑساں ژا۔تے سواریں مڑی گیساں۔
کیاں کیہ تکلیف ھوٸی گٸی تساں کی؟چنگی پلی ایں ۔ھن ایںویں اس نا پندراں سو دو ھزار پٹاسیں۔نہ بانہے تے چلتر کر ۔ھن یو نکے مٹے درد لگے رھسن گزارہ کر ھن۔
میں گٹھیاں نے دردے نال مرنی آں تے تساں کی مزاخ اے لگنی ماڑی ھر گل۔مری گٸی آں تے پتہ لگسی آ۔کوٸی پچھن وی نیا لگا۔۔۔کھٹے لگی گے آ تے کیڑے پے پین نیا۔
نہ میکی تمکیاں دینی ریا کر حوالدار اکرم واروں میں وی کرے بیاہ کری کنساں۔
یوہ مونہہ تے مسور نی دال۔اکرم دو پنشناں پیا کنناں۔آپناں تے کرے والیاں نا علاج وی مفت آ۔تساں کیہ کھٹی کیتی ساری عمرےماڑے سرے اپر اے چڑے رے آ۔ھن کوٸی نیا دینا ۔
دادو پلیز please ماما اور پاپا کی آخا ناں اجہے اسلام آباد نہ گچھن ۔اجے پندراں روز رھنے سکول کھلنے کی۔میں اجے دادا ابّو کولوں اپنیاں گلاں وی سکھی کنساں ناں۔نالے اسلام آباد گرمی وی بہوں ای۔دکھا ناں دادابو لوک کتھوں کتھوں پھرنے واسطے اتھے ساڑیاں علاقیاں چ اشنے تے اساں اتھوں اٹھی تے شہراں در نسنے آں۔
اخاں مکھن نیو لالا جبران ٹھٕیک آخنا ناں ادھا میہنہ پیا وا۔صوبدارے ناں وی دل تھیا رھنے ناں پر یوہ ماڑی نوں جیہڑی اے ناں یوہ بہوں تاولی اے۔اس کی نہ رانو لگنا۔
دادا ابو تاولی کس کی آخنے؟
ماڑا پتر جس کی بہوں جلدی وے۔
تے دادا ابو چلتر کس کی آخنے؟
چلتر پتر بہانے بنانے کیہ۔ اے جس ویلے تساں کیہ سکولے در دل نہ ھوناں تے چلتر کرنے ھونے آ۔ ” ماما اج پیٹ میں درد ھے۔“
مکھن نیو لالا میکی سمجھ نٸی اشنی یوہ کڑیاں کس طرح انہاں بند جند ڈبیاں ”فلیٹس“ وچ بند خوش رھنیاں۔ میں تے اتھے دو روز رھنی آں تے ماڑا روح کالہ ھون لگی پیناں۔نہ ھوا لگے نہ تُپ لگے نکے بڑے پیلے زرد کیتے وے ھونے تے خوش ھونیا رھنیاں کہ گوریاں ھوٸی غٸیژاں آں۔
دِدّے ٹھیک آخنے آ ۔ میں وی بہوں تنگ ھوناں ژاں پر کیہ کراں ھن مجبوری ھےبچے پڑھنے نہ ھون تے ھک منٹ وی نہ ریاں۔
پتر بس ھن جیہڑا بَڑھیں لٸی گیا اس مُڑی تے نہ اشناں۔اے حاجی کرم داد اوراں نے پنجھے نکے پنڈی تے پرہ کہو گچھی تے رھن لگی پے ادھر ھن کُرے کاٹے بادے وچ اے اشنے نکیاں نیں بیاہ وی ادھروں اے کری کندے نے۔ادھر سب کِش تباہ بربا د ھوٸی گیا نے۔ذمی ساری برباد کتنیاں سوھنیاں لڑاں سیاں وچ کاہ تے بوٹی جمی وی۔حاجی نے جینیاں اچھن گچھن لگہ ریا۔ھن اللّہ اے حافظ آ انہاں ناں۔لکھاں روپے مکاناں اپر لگے وے نے اُو اے جے مکان اس پورے علاقے وچ کُسے نے نیسے۔ھن ٹہنے پے۔
زیادہ زور انہاں اجے کلے نیاں کڑیاں وی دتاوا۔اے بہوں خوش رھنیاں اُدھر۔
لالا یاہ گل سچ آخنے آ۔کڑیاں بس آرام پسند ھوٸی گٸی آں۔ بس سُخ لوڑنیاں رھنیاں۔اپنی نیندرے سینیاں تے اپنی نیندرے اٹھنیاں۔شہراں وچ نہ کوٸی اچھے نہ گچھے۔بس اپنا پکاٶ تے کھاٶ۔لالہ اتھے ھن دِکّھی کنا ناں سارا دن کوٸی نہ کوٸی اشنا ں گشناں رھناں۔سارادن چاہ پانی وی چلنا رھنا۔تے یوہ اجے کلے نیاہ کڑیاں تنگ ھونیاں رھنیاں۔
ماڑیا پترا کیہ تنگی اے نے مہمان اللّہ نی رخمت ھونے۔کہار کوٸی اچھے تے بندہ کھلّے متھے نال آ بو وی نہ آخی سکے تے کیہ زندگی اے فر۔ھن کیہ تکلیفاں ژاں اناں کی۔ھر چیز اندرے وچ لبنی ۔چلاہ یونییاں بالنیاں ، مینہے وچ ترے ترے سلنڈر ساڑنیاں ، دودھ ڈبیاں نے ڈبے پے اشنے، دنیا نی ھر چیز گراٸیں نی ھٹی اپروں لبھی رھنی، گوشت مرغی سبزیاں ھر چیز پٸی لبھنی نے کرے نے اندر، پانیاں نے نلکے کِچناں تے غسلخانیاں وچ لگے وے ، کَر کَر فرج وی لگے وے ۔تے ھن اتھے رھنیاں انہاں کی کیہ سول آ نے۔
ماڑیا پترا اے تساں نے سامنے ما تساں نی اے۔ ککڑ بانگاں دینے سے تے اٹھنی سیاں۔نماز پڑھی تے ٹوکے وچ گشنی سیاں۔ منجی نی پاہ کَھسی تے اس کی مِیلنی سیاں۔ فر تساں ساریا کی چاہ بناٸی دیٸ تے سکول پیجنی سیاں۔فر پاہ گچھی تے ڈوغے وچ سٹنی سیاں۔پانی او پاندیاہ گچھی تے جھلیاری اپروں آننی سیاں پنج چھ چھ پھیرے۔
منجی کی نیلا وی پٹی تے بانی سیاں۔تندور بالناں ۔سبزیاں لاناں ، ھر چیزے نی دیکھ بھال کرناں۔ڈوغیاں چوں ساغ چنناں لسی چِھیلناں مکٸی نے آٹے گُنناں، روٹیاں لاناں۔تلّاں دیناں ،گارے لاناں، لیراں مارناں، یوہ سب کش کن کرنا سا۔میں اے کلی ملی کرنی سیاں ناں۔ ھک لسر۔
پہناں پراہ وی اس تِھیں دگنے اشنے سے، تے ترے ترے روز ٹغے وی رھنے سے، تے کدے وی متھے وچ کروٹھ نٸی باٸی۔ تے سفید پوشی وچ سوھناں سوھناں کَھلانی پَلانی وی رھٸی آں۔
ھن انہاں کی کیہ تکلیف ای۔فرج پرے وے ھونے سامانے نال، آٹا چار پنج پنج روز ناں گھنی تے فرجاں وچ تنی شڑنیاں، لاون ھِکے وار پکاٸی تے فرجےاچ باڑی شڑنیاں ، گوشت اگلا مُکنا نہ تے ھور اچھی رھناں۔ساڑے ویلے کسے ناں ڈنگر ٹاکے روڑناں سا تے یا بیماری نال مرنا سا تے گوشت نصیبے وچ ھوناں سا، کپڑے جھلیاری اپر کھڑی تےتونیاں سیاں ، ہتھاں نال مَلی مَلی تے چھالے پینے سے۔تے چادراں تے کھیس ڈمنیاں نال کٹنیاں سیاں ۔مَکِیّاں بَگّھیاں نے بَگّھے چِھلنیاں سیاں۔ڈنگر بکریاں وی نال سنبھالنیاں سیاں ۔بہوں بہوں قضیے تے زاو کیتے۔
دادو ذرا چپ کرا دخاں میں دادا ابو کولوں اوخے اوخے لفظ پچھی کناں دادا ھٹی، ڈمنی ،ڈنگر، بانگاں ،کروٹھ ،جھلیاری ،پاہ، ڈوغے تے سول کس کی آخنے؟
پتر ھٹی آخنے سے دکان کی۔ڈمنی موٹا ڈنڈا ھونا سا تساں نے بیٹ واروں تے ڈنگر جانوراں کی آخنے۔بانگ اذان کی آخنے تے کروٹھ جس گلے در دل نہ نہ وا تے زورے کرا تے مُنہ بناٸی کنا۔
جھلیاری جتھےپینےناں پانی ھوناں۔تے پاہ جانوراں نے گوبر کی آخنے ۔ڈوغا کھیت کی آخنے۔آٸی سمجھ۔
جی دادا ابو تے ھک رھٸی گیا ناں ۔سول کس کی آخنے ۔؟
سول پتر پیٹ وچ جیہڑا درد ھوناں اسکی آخنے
۔thank you داد ابو۔
مکھن نیو لالا دسا ناں یوھن ھور کیہ کرسن اپنی لادی کی اپنی زبان وی نے سکھاٸی سکےتے ھور کیہ کرسن۔ساڑی اے منا ناں اس ویلے مسیتی وچ حافظ وی کوٸی نہ سا ھوناں بچیاں کی مسیتی ناں سوق وی آپوں اے دسنے سیاں۔ انہاں اجیہ کلے نیاں کڑیاں کولوں دو ترے ترے نکے وی نے سمالن ھونے ۔
نزیراں اجے کلے نے نکے سمالناں وی کوٸی سغلا کمتے نہ ناں۔توں ھک دھب دینی سی ایں تے آپنے کیہ پورے ملحے نے نکے ڈری گشنے سے۔ھن ماوریں پٹنیاں رھنیاں تے رام آ جے نکیاں اپر کوٸی اثر ھوناں۔
اخاں جی اسںاں تےآخی ناں پالے تے سمالے اے نے یوہ آپوں گھبرو جوان بنے؟
۔یوہ کیہ کماٸی کرنیاں فزری اٹھی تے او پنپر جے بنی شڑنیاں نے، تے راتیں کھولنیاں نے، تے راتیں بننیاں نے تے فزری کھولنیاں نے۔جاٸی جاٸی ٹیر لگے وے اناں پنپراں نے۔جدھر دکھا ڈوغے پرے وے۔ھر سولت انہاں کی لبھی وی۔فر وی اکیاں نکیاں ویاں ھونیاں۔
اُف نزیراں توں کیاں آپے کی ساڑنی بالنی ایں ۔انہاں نی قسمت وچ یوہ سکون تے خوشحالی لخی وی۔ا نہاں نے نصیب چنگے اے۔ اللّہ انہاں کی سخ دتّا وا۔روز بروز سہولتاں ھونیاں جلنیاں۔ساڑے توں اگلے لوکاں نا حال ساڑھے تھیں وی ماڑا سا۔اساں کی فر وی سینے واسطے کھٹاں تے تھیاں سیاں ناں او لوک تیال ترتی اپر رکھی تے سینے سے۔بس اپنے اپنے نصیب اے۔انہاں نے نصیباں نال اللّہ کریم اساں کی وی پیاہ دینا۔اس مالک ناں شکر ادا کر۔ اساں کی وی جینیاں جینیاں سب کِش دَسّی شڑیاس۔ھن زندگی انہاں گزارنی جتھے دل لگناں نے رھن گراں رھن یا شہراں وچ رھن۔بس خوش رھن ساڑیاں خوشیاں ھن انہا نال ژاں۔
مکھن نے لالا ٹھیک آخنے تساں وی پر کیہ اے قضیہے تے زاو اس واسطے کیتے سے کیہ آخری عمرے اساں اپنیاں پوتریاں تے پوتریاں کی ملنے واسطے وی چھ چھ میہنے تے سال ترسنے رھساں۔۔۔۔۔ 😭😭😭
اگے وی چلسی آ۔
