وِچلی گل
لخت عبدالوہاب رحمانی اچھہ جی نادر باجی( تایا ) بڑے دیہاڑیاں بعد ساڑی یاد آٸی آ۔ اج کسطرےپُلِّیہ گٸے آ ۔
بس یرو باٶ جی مصروف ریاں ژا. نِکّے نے مکاناں ناں کم رھناں سا تے او بس بڑیاں مشکلاں نال مکمل کیتا نہ مستری لبناں تے نہ مزدور جدر جُلا لوکاں کم لواٸے وے۔اج فارغ ھویا ژآں تے نکے آخن لگے لالا عید وی سرے اُپراچھی رٸی کش قربانی ناں وی کرا۔پتہ لگہ سا فرمان پَیّہے کول کوٸی بکروٹاآ تے میں سوچیا پتہ کری اچھاں۔ھن اُدھروں پیا مُڑیا وا اشناں آں۔تساں نی بیٹھکے ناں بوہا کھلا وا ڈٹھا تے سوچیا دو مہینے ھوٸی گیہ ملاقات نٸی ھوٸی تے ملی جلاں۔
باجی بڑی مہربانی تساں نی قسمی میکی وی تساں ناں کٹ لگناں سا۔کل اے کرے آلی کولوں پیا پچھناں سیاں پتہ نہ کیاں باجی بہوں دیہاڑے ھوٸی غے نے آۓ۔مے وی بس اس کرونے نے ماریاں کُرے وی نہ گیا کار اے کھٹ ٹِلّی کیتی ریٸی۔تاٸی نزیراں اوراں ناں سناٶ کِسرے اے؟
یرو باٶجی بس اُس کی وی کَھنگ کُھرک لگی اے رھنی. کدے شُگر اپر تھلے کدے بلڈپرشر تِیں بَڑیں ھوناں رھناں اس۔دوایاں دنیا جہان نیاں پھکیاں نے پھکے کھانی رھنی پر کوٸی حال سواد نا اس ناں اُف ہاۓ لگی اے رھنی۔او میاں محمد بخش اوراں آخیا سا ناں۔۔۔
کوٸی آکھے پیڑھ لکّے نی کوٸی آکھے چُک اصل گل محمدبخشا اندروں جاندی اے مُک بس یو ھن کش ناں کش لگا اے رھسی ساڑیاں لتّاں وی ھن قورے وچ آں۔
باجی الّلہ پاک تساں کی تاٸی سمیت صحت تے تندرستی دے اے بیماریاں وی الّلہ پاک نی رحمت ھونیاں۔حدیث وچ آ کہ بندے کی جہیڑا کنڈا لگنے نال وی درد ھوناں الّلہ کریم اسنے بدلے وی اس نے گناہ معاف کرنا۔تے بکروٹے ناں فر کوٸی سودا جڑیا ویسے بکروٹاتھیا تے بہوں سوہنا ژا
باٶ جی تھیا تے واقعی سوہناژا پر مُل وی تے ھمالیہ نال گلاں کرنا ناں ۔فرمان عور آخنے کل جناں ھک پنجاہ ھزار دٸی ریا پر میں نہ دِتّا اس نا مطبل آ نہ دینے آلی گل ھوٸی ناں۔مال تے بارہ کاھو منڈی وچ وی جہان جہاناں نا ژا پر اتھے نے مالے ناں کوٸی بھروسہ نہ ھوناں پچھلی دفہ دسنے بندہ ھک اتھوں داند ھک کنی آیا چنگا مٹاتازہ دِسنے وچ پنج من سا راتیں آنی تےکار ٹوکے وچ بدھا نے تے صبح اٹھی تےڈٹھانے تےداندے نی جاٸی بچھہ ھک بدھا واسا۔اسکی انہاں ظالماں کوٸی ٹیکہ لایاواسا اس نال او سُجی تے پورا داند بنی گیا راتیں سوت لتھاس تے نکا جیا بچھہ بنی گیا۔اس ماریاں سوچیا کوٸی گل بنی گچھے تے اتھوں اے چاٸی کناں۔
باجی کش مسلہ نہ گل بناٸی کنساں اگلے نی چیز ای جیکی وی منگے کِننے والا وی تے اپنی مرضی نال کِنسی ناں۔پر باجی ھک وچلی گل تے دسا پتر تساں نے چار اے ھک دوبٸی ھک قطر ھک فوج وچ صوبدار میجر ھک سی ڈی اے وچ ملازم تے بکروٹا ھک قربانی دین لگے آ۔تساں نے تے سارے ٹبرے اپر قربانی واجب ای ھور تے چھوڑا تاٸی اورں نے بانہں نال ترے لکھ نے کڑے لگے وے اناں نی وی تے قربانی بننی۔ عی اےحال ماڑیاں پاویاں تے تساں نیاں نوعاں نا آ او وی ذیورے نال لدیاں ویاں ھونیاں اناں ساریاں اپر قربانی واجب ای۔تساں ھک بکروٹا دٸی تے الّلہ کی نعوذباالّلہ پطارن لگے آ۔
یرو باٶ جی اتنے کتھوں آناں جی۔میں تے اج پہلی وار یوہ گل سنتی ۔ماڑی عمر وی سٹھ سال ھوٸی گٸی اس وچلی گلے ناں تے اج پتہ لگاہ۔ پر باٶ جی اساں وی تے اتنی عمر گزاری شڑی اساں کی وی پہلیاں اتنی باریکی نال کُسے نہ دسیا۔مولویاں وی اتناں زور دٸیی تے کدے نہ آخیا۔
باجی پہلی گل تے یوہ ای ناں تساں آخنے آ اتنے پپیسے کتھوں آناں۔اے الّلہ پاک نی نعمتاں نی ناشکری کرنے آ۔تساں اپر اس ذات نی جتنی کرم نوازی اے اتنی ساڑے پورے گراں وچ کسے اپر نٸی۔تساں نا تے ماڑا کہ آ سب رحیم و کریم رب نی دین ای ساڑے توں چنگے چنگے لوک بدحالی نی زندگی گزارنے پے۔الّلہ پاک وی اپنی پاک کتاب وچ ای گل آخناں ناں کہ جیہڑا میں دتّا وا آ اس وچوں دیا تے فر ساڑا کہ ریا ۔دوٸی گل جیہڑی مولویاں نی آخی آ وا وی کسے حد تک ٹھیک ای انہاں کی وی ھور اختلافی مسلیاں داروں بیہل لگے نے تے ادھر زور دین ناں۔تے کدے او بے چارے دسن وی تے اساں وی اپنےاے مطلب نی گل سننے آں تے پَلّیہہ بھانے آں۔آپوں وی تے بندے کی دین ناں علم سکھناں چاٸی نا ناں۔دین ناں اتنا علم جیہڑا زندگی گزارنے واسطے ضروری آ جس وچ حرام حلال جاٸز نا جاٸز حقوق فراٸض بندیاں نے حقوق الّلہ نے حقوق انہاں ساریاں ناں سکھناں ھر مسلمان مرد عورت اپر فرض آ۔کل قیامت نے دن انہاں ساریاں نے بارےپچھ ھوسی۔ اُس ویلےاے بانہ نہ چلن لگہ کہ میکی پتہ نہ سا۔
باجی کدے خفا نہ وا تےبڑے احترام نال ھک گل پچھاں تساں کولوں بی. بی. سی تے واٸس آف امریکہ کتنے عرصیہ توں سننے ژا؟
پَتریا بی بی سی تے کوٸی چالیہ سالاں تھیں تے واٸس آف امریکہ کی وی پندراں ھک سال ھوٸی گٸےسننیاں۔
باجی ھن دسا ناں فر کُس ناں قصور آ سیاست نی گل کراں تے تساں قمر زمان کاٸرہ تے خواجہ آصف کی وی اگے نیاہ پین دینے پارلیمانی جمہوریت نی پوری تاریخ لیاقت علی خان توں کنی تے عمران خان تک تساں ک یاد ای آٸین پاکستان ادھا تساں کی یاد آ۔ووٹاں تساں کی سردار عناٸت الر حمان مرحوم توں کنی تے مرتضٰی جاوید عباسی تک یاد ژاں کہ کُس کِتنیاں کِتنیاں کِندیاں۔ شجرے تساں کی ہارون الرشید توں کنی تے اپنے دادے گوھر خان جیاں اشنے۔ایہ اے حال اساں ساریان ناں آ۔کڑیاں جنیاں کی دکّھا تے عمران نواز شریف تے زرداری توں تھلے گل اے نے کرنے پر بڑے افسوس نی گل ای کہ اساں کی نہ پتہ تے واجبات ناں نہ پتہ ۔زکوة ناں نہ پتہ۔ حج عمرے ناں نہ پتہ۔ قربانی ناں نہ پتہ۔ میاں بیوی اولاد والدین نے حقوق ناں نہ پتہ۔ علما۶ تے اِتھے تک وی دسنے کہ جس دن توں تساں اپر قربانی واجب ھوٸی او ساریاں تساں کی دینیاں پیسن۔الّلہ پاک ساڑے حال اَپر رحم کرن۔
یرو باٶ جی تساں تے اَج میکی ھلاٸی تے رکھی شڑیا اس حساوے اپر تے اساں کی نو قربانیاں دینیاں پیسن۔بونہھ مہربانی تساں نی ماڑے علم وچااضافہ کیتا آ۔میں ھن اے جلی تے گل کرناں آں نِکیاں نال صوبیدار وی کَر آیا وا تے قطر دوبٸی والیاں نکیاں نی وی راتیں فون اشناں ھوناں انہاں نال وی گل کرناں آں۔گل کیہ کرنی ھن بس دینی اے دینی۔ھک چیز واجب ای تے فر کیہ دکھناں ۔
الّلہ پاک تساں کی اس ناں اجر دے۔ تے قربانیاں تساں نیاں قبول کرے۔کو ٸی ماڑی گل مندی لگی وے ژا یاکوٸی گستاخی ھوٸی گٸی وے تے میں مافی چاھنا ژاں۔۔۔۔۔۔۔۔۔۔۔۔جاری
