وِچلی گل
لِخت= عبدالوہاب رحمانی
او دادا ابّو اچھی رے دادو۔دادو
او ماڑا پتر اے دِکّھا داں دادا ابو کیہ آندا۔ واٶ; لیز تے سلانٹیا
دادو کتھے نی ژا ؟
او نذیراں ٰ
جی جی بڈھیڑو مُڑے آ۔ بکروٹے کی گیۓ سیا کوٸ گل نیٸ بنی ؟
گل کے بنی ھن گل بکروٹے توں اگے نکلی گیٸ ھن داندے تے منجی نی گل کرا۔
او مکھن نیو لالا اپنی نویکلی قربانی ٹھیک سی ناں ۔کن گلاں سنسی ساریاں نییاں۔ کوٸ آخسی مہنگا ژا ۔کوٸ آخسی گوشت تھوڑا ژا۔
آخسی کُن سارے آپوں اے تے ھوساں۔کتھے ژآں نکیاں اناں کی بُلا تے صوبدارے کی وی بلاٶ۔
علی پتر امّی کی تے ابّے کی آخ اچھہ لالا بلانے نییا تے چاچیاں کی وی دس۔
دِدّے خیر ای ناں کیہ آخنے لالا اُر۔
میکی صوبدارا نہ پتہ کیہ گل ای۔
نزیراں اچھی رہیاں ساریاں؟
مکھن نے لالا کوٸ آخری وصیت تے نییا ناں کرن لگے؟
توں ھن ذرا اپناں مونہہ بند کر میں کوٸی سنجیدہ گل کرن لگہ ژاں۔میں اج باٶ رشید اوراں کی ملی تے اشناں آں۔انہاں تے اج ماڑے کَن رَتّے لال کری شڑے۔
کیہ مطلب کَن چھکنے رے تساں نے؟
فر اُوۓ گَل ۔نذیراں تے تساں سارے گل غور نال سنا۔باٶ رشید اُر تے آخنے تساں نے سارے ٹبرے اُپر قربانی واجب ای۔
سارے کہ مطلب پورا کہار قربانی دیسی؟اگے وی تے اتنی عمر مکھن نے لالا اساں گزاری شڑی پر ایہہ لوٹی اساں نٸ ڈٹھی۔او کیہہ آخنے ماڑے چارے پتر ھن قربانی دین۔ھک تے ساڑیہہ لوک وی کسے کی چنگی حالتے دکھی تے وی نے سخانے ناں ۔لوک ھن دکھی رے ناں نادر خانے نے پترچنگی کماٸ کرنے پے تے لواٶ نے پیسے جیہڑے تھٸے نے۔تساں مکھن نےلالا ادھر کہ لوڑن گٸے سیا اِتّھوں تساں بکروٹے ناں پتہ کرن گٸے سیا تے سِر اُتّھوں نَکرے تھیں گچھی کڈیا ژا۔
نذیراں ‘ پتر تے پتر اے ناں ساڑیاں نوعاں اپر وی قربانی واجب ای تے نالے تواڑے تے ماڑے اپر وی۔
شکر آ الّلہ پاک ناں اس ویلے حضرت اسماعیل علیہ اسلام نی جگہ دنبہ جنت وچوں پیجی شڑیا سا الّلہ جی اوراں نہ تے یوہ لوک تے ماڑے چارے پتراں نی قربانی تساں کولوں اج کرواٸ شڑن وا۔مکھن نے لالا تساں وی تے ساری زندگی اتھے اے گزاری ناں دسّا ناں کِتنییاں ھک قربانیاں لوک دینے سے۔سارے گراٸیں وچ ھک چاچا فضلداد اُر ھک حاجی نذر اُر تے دِدّے سلیمہ اوراں نے پتر قربانی کرنے ھونے سے۔
نذیراں اس ویلے لوکاں کول تھیا کہ سا؟ جناں کول مال بچھے تھٸے وی سے تے اتنی تعلیم وی تےکسے کول نیہہ سی ناں ۔
اخاں بس ھک باٶ رشید اُر اے پڑھی غے اُو وی بڑے خُلے عالم اے اُو تے سکول کالج اے پڑھے ناں ماڑے صوبے دارے تے مکھن دس دس اے پڑھیاں پر حق نواز تے ذوالفقار تے چوداں چوداں پڑے وے انہاں کی نہ پتہ قربانی ناں؟باٶرشید کی بہوں پتہ آ۔
بس ھن ایف ایم 101 واروں سٹأرٹ ھوٸی پیٸ ھور کسے نی تےھن نہ سُنسی۔
دِدّے باٶ رشید اوراں کول دینی علم وی جہان آ اناں یا گل اینویں تے نہ کیتی ھوسی ناں۔صوبدار پُترا یو دِدّے تواڑی ھن چُلّیِ پیٸ ناں کسے نی تے سننی وی نیٸ نا۔پتر میں باٶ اوراں کولوں اٹھی تے اشنیاں مفتی عمیر اُراں کولوں وی ھوٸی تے آیا آں انہاں وی ای اے گل دَسّی جیہڑی باٶ اوراں دَسّی۔
ماڑے مکھن نیو لالاپرانے استاد میاں اشرف اور ھونے سے تساں وی تے قرآن انہاں کولوں اے پڑھیا ناں۔ انہاں تے کدے ای اے جیہا مسلہ نہ کیتا۔ھک تے اج کل جدھر جلا مولانے تے مفتی ھر جاٸی وچ اے۔مفتی صاب آخیا یو کرا یو نہ کرا یو جاٸز آ یو نجاٸز آ۔بیاہ ھیاں کرا ھیاں نہ کرا۔آخی ناں اتھے نے لوک ھن مسلمان ھوۓ۔
حالہ ددّے گل تے سنن دیا ناں مفتی عمیر اوراں کیہ آخیا لالے کی۔
سنن کیں آں دے چالہیاں سالاں توں ایہہ حال آ اس نِیاں سُنی سُنی تے ماڑے وی کَن سُن ھوٸی گیۓ پر تساں نی دِدّے نی سُنانے نی سپیٹ ای اے رھی۔
پر مکھن نے لالا سنتی تساں وی کوٸی نیٸ ماڑی۔ماسی حلہ ھن مانویں نی وی تے سنا ناں۔مانواں مفتی اوراں کیہہ آخیا ۔
شگفتہ پتر مفتی صاحب آخيا ھر او مسلمان جہیڑا عقل والا آ بالغ آ ھک جاٸی نا رھنے والا آ مطلب مسافر نہ وے اپنی ذاتی چیزاں نا مالک وے مثلا سونا، چاندی، نغدی ،تجارت واسطے مال اور کہار وچ ضرورت توں زیادہ فالتو سامان اناں پنجاں قسماں نے مالاں وچوں کُسے ھکی نی یا سارے مالے نی مالیت موجودہ وقت نے لحاظ نال 57000ستاون ھزار روپےیااس توں زیادہ تھٸی تے انہاں ساریاں کڑیاں جنیاں اپر کلیاں کلیاں قربانی کرناں واجب ای ۔ھن پتر آپوں سوچی کنا سارے سیانے بیانے ژا۔
کرن ماڑۓ تیّہے! توں وی میٹرک کری تے چھ سال سلاماں باد درس پڑھنی رھیٸ ایں تے تساں کُرے یوہ قربانی نے بارے نیہاہ پڑھیا۔عالم تے عالمہ کی علیحدہ علیحدہ چیزاں پڑھانے درساں وچ۔؟
مانواں ابیہہ کِش پڑھانے سارے مسلے مساٸل دسنے۔
تے پتر ماڑی پہنوں تے پنیّہے تساں کی اس واسطے تے نہ سا پڑھایا جے تساں اتھوں گڈھا سنداں نا چاٸ آنا۔اس واسطے اتنی تکلیف کٹی سی نے جے تساں باقیاں کی وی اچھی تے راہ باسا ۔کیہ فاٸدہ ھویا تساں کی چھ سال پڑھوانے ناں۔کتنے عرصے توں ساڑے ساریاں اپر قربانی واجب ای کسے نے کنے اپر جُوں تک نٸی رینگی۔ماڑی بڈھی نذیراں سمیت تساں لکھاں روپیاں ناں زیور لگا وا کدے اج تک میں نہ ڈٹھا کُسے زکٰوة وی دِتّی وے۔کسطرح اگلے جہاں اپنے مولا نال منہ لاسا ۔اپنے واسطے اگ کٹھی کرنے سارے ۔نغے نیو مرناں نا تساں؟
ماڑے کول چوۓ مزماں حرام تساں نی کَھٹّی (کماٸی) نی ھک چیز وی نیٸ۔ تساں تے جیہڑا میکی اپنے لالے جی اوراں ناں واں تے مُرکیاں دتیاں سییاں نے او وی بیچی تے داند کنی آۓ سیا۔ماڑےکول الّلہ لنمبی زندگی دے ماڑیاں پتراں کی تے سب کِش انہاں نی کماٸی نا آ۔
ددّے بس واسطہ آ اجّے ساری پڑاس کڈسا لالے اپر ۔ھن قربانی نی سوچا۔
لالافر تےاساں چوآں پراں تے اساں نیاں بیغماں اپر قربانی واجب ای۔ددّے کول وی سونا تے پیسے وی ھوسن نے۔ سارے اے پیجنے رھنے نے۔
اخاں پتر اسّی ھک ھزار تھیا سارے پیجنے رے آ تے میں رکھنی رٸی آں۔
ڈٹھا اےا صوبدارہ ماٶ تواڑی ماڑے کولوں چھپاٸی تے رکِّھس ناں تے ھن فر نکّلسن۔ پتر ماڑے کول وی نوّے ھک ھزار تھیا تے میں وی قربانی دیساں۔
میں تے مکھن نے لالا آپناں نویکلا بکرا کِنساں۔
توں بڈھیے اپنی گوغی بکھرےاے لاٸیں۔ فر سارے راضی آ قربانی اپر تے دو بیہڑے چاٸی کننےآں نذیراں اپنا بکرا چاٸ کِنسی ۔لالا فر اساں نو بندے ھوٸ گیساں ناں ۔
صوبدار پتر ھکی وچ پنج تے ھکی وچ چار ھوٸی رھساں ۔مفتی صاحب آخنے چار وی پیال ھوٸی سکنے۔
شگفتہ تے جمیلہ پتر راتیں کُرے مکھن تے ذوالفقار ناں فون ایسی ناں تے دسیا نے کی آں جے قربانی کی وی پنج دیہاڑے ریہی گیہ فر سوادے ناں کوٸی ڈنگر وی نہ لبن لگا۔نعمان وی راتیں اچھی رھسی ۔نذیراں کی تے بکروٹا اے کنی دیساں بہوں سوھناآ۔
دعا کرا الّلہ پاک قبول کرے تے باٶ رشید کی وی اس ناں اجر دے۔۔۔۔۔جاری
