وِچلی گَل
ٹوٹا نمر۔٣
لِخت عبدالوہاب رحمانی اچھو باٶ جی عیدی نیاں مارکھاں ھون نییا۔
تاٸی نزیراں خیر مارکھاں۔تساں ٹھیک ژا ناں؟ اس دن باجی گٸے سے تے پچھیا سا تساں نی۔باجی کُر گیے۔مسیتی وچ رش سی تے او پہلیاں نکلی آۓ تے مں آخاں ملی جُلاں نے ۔
بیہو میں بلانی آں نے بہڑیاں کی پانی دینے۔
کتنے بہڑے آندے نے اُس روز تے بکروٹا کنن گیۓ سے۔
بس تساں مسلا سمجھایا نے تے اچھی تے ساریاں کی ماڑے سمیت بلاٸی کندا نے۔تے آپوں اے گیۓ تے لالے رفیق اوراں کولوں دوۓ بہڑے کنی آیۓ ڈیڈھ لکھ نے۔اے اچھی رے۔
باجی عیدی نییاں مارکھاں۔کرے پہلیاں نکلی آۓ آ ۔میں سوچیا ملی جلاں۔
باٶجی عیدی نییاں اصل وچ تساں کی مارکھاں جنہاں اساں کی اس پاسے در تیہان دوایا آ۔کتھے ھک قربانی تے کتھے نو قربانیاں۔الّلہ پاک تساں کی اس ناں اجر دے۔تساں نی تاٸی وی اس دفعہ حاتم طاٸی کی پچھے ماری گٸی۔چالیہ ھزار ناں بکرا پہیے فرمان والا چاٸی کندا نے۔
اخاں تساں نے تے خزانے ڈُھلنے رے ناں۔اے تے الّلہ جی ماڑے پتریّیے باٶ کی لمی زندگی دے جس تساں کی آخری عمرے ھدایت دیٸی شڑی نے۔
تاٸی ھدایت نی توفیق الّلہ جی اور دینے انسان ذریعہ بُنی گشنے۔
یرو باٶ جی ویسے اس دفعہ کرونے نے باوجود وی لوکاں قربانیاں زیادہ دتیاں نیا۔
باجی ھن لوکاں وچ شعور اچھن لگی پیا ۔ٹی۔ وی اپر وی علمإ وعظ نصیحتاں کرنے رھنے فریو موباٸلاں نال جتھے ھور براٸیاں آٸیاں اتھے لوکاں نے علم وچ وی اضافہ ھویا۔اے شعور ھن روز بروز بدھناں رھسی۔
دادا ابّو جلدی کرا ناں بیلاں کی کِلّے کاٹسا ۔میں ویڈیو بناساں ناں تے اپنے فرینڈز کی پیجساں ناں۔
باجی یو کس ناں نِکّا ژا۔ماشاءاللہ یو کتھے ریاہ ؟
باٶجی یو صوبدارے ناں نکا ژا جبران۔ ای اے ھکے نکا أس۔
الّلہ پاک سلامت رکھس۔باجی اجازت دیا میں وی نکّے ڈیکنے ھوسن داند ذبح کرساں۔
باٶ جی میں کش مدد امداد کراں وا تساں نی پر ھن ادھر وی ترے نغ اے۔
میربانی باجی میں کساٸی بلایا وا۔کری دیسی۔کیہ آخیا أس کتنے پیسے کنسی آ۔باجی پچھلی دفعہ ھک ھزار ھک ھسے ناں کندا ساس۔ست پیال سیاں تے ست ھزار کھڑیا ساس۔ھن آناں سا کش کری کنساں۔
باٶ جی انہاں کساٸیاں وی انت آندی وی۔پچھلی دفعہ ماڑے جماترے ناں چوٹے ھکی وچ ھسہ سا تے کساٸیے ذبح کری تے چم لواٸی تے مٹّے مُٹّے ٹوٹے کری تے نسی گیا آخناں میں دوٸی جاٸی ٹیم دتّا وا۔تے میں گچھی تے اسی گوشت نکا نکا کری دتّا۔
بس باجی ھن مجبوریاں ژاں ھتوں آپوں کم کوٸی کرنا نہ۔ تے او وی نجیز فیدہ چانے۔ باجی میں ھن گیا۔فارغ ھوٸی تے کل چکر لایا ناں فر گپ کرساں
دادا ابّو ھک گل تے دسا کل باٶ رشید اُر ساڑے کار عیدی اپر آٸے تے تساں نال گپاں مارنییاں کَڑی کَڑی تساں کی باجی تے دادو کی تاٸی کیاں آخنے سےتساں کوٸی کُڑی ژا۔میکی دادا ابو اتنا رُوٕ چڑیا ژا۔ اسںاں نمرہ باجی کی باجی آخنے ژاں او تساں کی آخنے سے۔میں اناں نال گل وی نٸی کیتی بلانے وی رے۔اناں اپروں مڑا دل اے پجی گیا۔
او نہ ماڑا پتر او ماڑا پتریا آ۔تے ماڑا سنگی وی آ۔ماڑے نال بوں پیار کرنا۔میکی وی بوں چنگا لگنا
دادا ابو یو پتریا کہ ھوناں؟
جبران پتر او ماڑے مانولیرے ناں پتر آ نا۔اس واسطہ…
دادا ابو مانولیرے کون ھوناں؟ اٗف جبران ماڑا پتر مانولیر مانوے نے پترے کی آخنے۔
اُف دادا ابو اج پتہ نہ تساں کیڑی لینگویج بولن پے آ۔ ایہہ مانوے کون لوگ ھوتے ھیں؟ماڑا پتر ھن سن باجی ناں ھم لوگ ابّا کے بڑے بھاٸی کو بولتے تھے ۔
اچھہ دادا تایا ابّو کی باجی آخنے۔گُڈ۔
جی جی تے پتریا پراٶ نے پترے کی آخنے۔تے مانولیر ماموں نے پترے کی آخنے۔
اچھہ دادا ابو کزن ھویا ناں فِر؟
جی ماڑا پتر۔تے ماموں کی اساں مانواں آخنے آں۔جس کی تساں انکل آخنے آ۔پر دادا اساں چاچو کی وی انکل آخنے آں۔ھن یو واچwatch میکی مکھن انکل گفٹ دتّی تے ماڑے فرنڈ پچھنے کُس دتّی اے تے میں آخناں آں انکل دتّی انہاں کی کسطرح پتہ لگسی کہ ماموں دتی کہ چاچو؟
پتر یوہ ھن انہاں کُلوں اے پُچّھا جنّاں تساں کی یوہ پڑھایا۔
دادا ابو پاپا تے ماما تے یو چیزاں اساں کی نییاں دسیاں نے۔
جبران پتر تواڑا پاپا تے تواڑی ماما ھن ماڈرن ھوٸ گٸے ناں۔پہلیاں اناں کولوں پُچھا ناں کہ تساں اپنے ماٶ پیو کی کہ آخنے آ۔
داداابو او میکی پتہ ژا ناں تساں کی لالہ تے دادو کی ددّے آخنے۔دادا تساں بوڑھے ھوٸی گے آ ناں تاں تساں کی لالا تے دادو کی ددّےآخنے ناں۔دادا ابّو میکی اپنی لینگویج بہت اچھی لگنی پر پاپا تے ماما نے بولن دینے بلکہ ڈانٹنے وی اے۔دادا ابّو اساں کی اسکول وچ وی میم پنشpunish کرنے کدے اپنی زبان وچ گل کراں تے۔ میکی تَرے وار فاٸن fine کیتا نےتے پرنسپل سر کولوں وی پنشمنٹ کرواٸی نے۔داداابو میں ھن جس ویلے گھر اچھیا کرساں تے تساں کولوں سکھیا کرساں تے تساں نال بولیا وی کرساں۔دادا ابو اے جانوراں نے روم Room کی کیہ آخنے تے جس جگہ وچ جانور کھانا کھانے تے اسی کیہ آخنے؟
جبران پتر اس کمرے کی ٹہوک آخنے تے چارے والی جگہ کی کُھرّلی آخنے۔
دادا ابو ٹوک تےکھلری ھن میکی اچھی گٸے۔
پتر کھلری نہ کھرلی۔
دادا ابو سپلنگ کریں نا اسکے۔
پتر khur li اب آٸی سمجھ۔کھر۔ لی۔
دادا ابو اب آگٸی ۔اچھا دادا ابو تساں اپنے دادا ابو تے دادو کی کیہ آخنے ھونے سیا۔
پتر اَس دادے کی ادّھا تے دادو کی امّاں آخنے سیاں۔
تے آنٹی تے انکل کی کہ آخنے سیا؟
پترآنٹیاں ترے ھونیاں ناں۔ھک چاچے نی بوھٹی
دادا بوھٹی مینmean؟
پترجبران بیوی ناں۔
اچھا دادا ابو واٸف wife
جی جی چاچے نی بوھٹی کی چاچی۔مانویں نی بوھٹی کی مانویں تے لالے نے نی پہنوں کی پُھپّھی آخنے سیاں۔
تے انکل کتنے ھونے سے دادا ابّو؟
پتر انکل وی ترے ھونے سے ناں لالے نے پراٶ کی چاچا تے۔۔۔
دادا ابّو یو لالے کون ھوتے تھے؟
اُف ماڑیا پترا لالا پیو کی آخنے سے
۔ پیو؟
پآپآ کی۔
اف دادا ابّو اتنی مشکل لینگویج کس طرح بولنے سیا؟
کُتھے مشکل تے اوخی سی سارے جے بولنے سیاں۔ پھپھی نے کرے والے کی پھپھڑا تے ماسی نے کرے والے کی ماسڑا آخنے سیاں۔
دادا ابو ماسی جیڑی کار کم کرنی ھونی؟
نہ جبران پتر ۔فوزیہ کُنّ ای۔تواڑی کیہ لگنی؟
دادا ابو فوزیہ آنٹی تو ماما کی سسٹر Sister ھیں۔
تو اسی کو ماسی آخنے ناں ۔
دادا ابو بس یو سبق بہوں آ۔دادا ابو دوا کرا ناں ساڑے سکول نہ کُھلن ناں تے میں تساں کولوں جہاں ساری اپنی لینگویج سِکّھاں ناں تے میں تے زینی فر اسلام آبادگَچّھی تے پاپا تے ماما کولوں چَھپّی چَھپّی تے بولیا کرساں فِر۔۔۔۔۔۔۔ ۔۔۔۔
