وچلی گل
ٹوٹا نمر 4
لخت ۔ عبدالوہاب رحمانی
دادا ابو اچھہ ناں بازارے کی جلاں جشن آزادی کی وی ھک روز ری گیا تے میں نہ شرٹ کندی تے نہ چنڈا آندا نہ بیج کندے۔پنڈی ھونےسیاں تے کرے اوپر وی ٢ یا ٣ تاریخ چنڈا لاٸی شڑنے سیاں۔پاپا وی نےناں جُلنے بازار ۔جبران پتر اس دفعہ نہ چنڈا چاڑیا آ تے کہ ھوسی؟ شرٹ کوٸی ضروری وی تے نٸی ناں۔اسںاں کی وی تے اتنا عرصہ ھوٸی گیا اساں تے شرٹاں نییاں لاییاں۔نہ بیج سے نہ چنڈے سے۔تساں نکیاں اجہ کلہ نیاں نویاں نویاں گلاں کڈی کندیاں۔ او نو No دادا او ھن سارے کنٹری country وچ لوک 14 اگست منانے ۔راتیں ٹی ۔وی اچ نیا ڈٹھا بازار چنڈیاں تے فلیگز Flages نال سجے وے ھونے۔بچے پیرنٹس Parents نال شاپنگ Shoping کرن گشنے ناں۔
اَلسَلامُ عَلَيْكُم وَرَحْمَةُ اَللهِ وَبَرَكاتُهُ ،باجی کیہ حال ژا؟اج دادا پوترا کیہ دوخی سوخی کرنے آ؟ اچھہ باٶ جی۔آخنا بزار کنی جلا چنڈا تے بیج کنساں کل 14 اگست ای۔تے جشن آزادی والی شرٹ وی کنساں۔یرو باٶ جی ھن بوں کش نہ ھون لگی پیا۔ساڑے ویلے تے یوہ کش نہ سا ھوناں اساں وی تے اسے ملخے نے بشندے سیاں۔کیہ اساں کی اس ملخے نال مخبت نیہی سی۔لوک ملخ اپر جاں دینے واسطہ ہر ویلے تیار رھنے سے یوہ ھن تِیہ تِیہ کش بہوں نٸی شروع ھوٸی گٸی۔ماڑے پترییے ناں پترآ پچھلے سال 14 اگست اپر میں ڈٹھا اس وی چنڈیاں والے کپڑے لگے وے تے تھیا کتناں سارا مول ھک سالیہ ناں متھے نال وی کش بدھا وا سیس تے بانہں نال وی۔انت آندی وی نکیاں بڑیاں۔ٹی وی اپر وی ھک گمداند پیا وا ھوناں۔شہراں وچ دکھا تے اتھے ملا اے ھک سانگ لگی وی ھونی جلوس نکلنے تاڑا پہریا پٸی وی ھونی۔میں تے سوچیا کروڑاں رپیہے لوک زایاہ کرنے کپڑیا ،چنڈیاں،بیجاں تے چنڈیاں اپر دسہ کیہ فیدہ ژا انہاں ناں؟ ایں وے وی ملخے ناں برا حال ھویا وا۔جیہڑا اشناں اۓ لٹی لٹی تے اس کی کھانا۔جو بہیمانی دکھا اتھے ای ۔ھر آدمی اپنے فیدہ نی اے سوچناں اپنے روپے پچھے ملخ تے قوم ناں پاویں لکھ زایا ھوٸی گچھے۔حرام کدے کسے کی پرواہ ای۔
دادا ابو دسہ ناں کلے جلساں بزارے کی؟.فر چیزاں ختم ھوٸی گیسن ناں۔
اچھہ پتر جلساں ناں مزمان آٸے ناں ۔شامیں جلی تے کنی دیساں پترے کی۔
باجی میکی تھوڑا جیا اختلاف آ تساں نییاں گلاں نال۔اے تے بڑی خشی نی گل ای کہ ساڑیا لوکاں نے اندر وی وطن نی محبت ناں جذبہ پیدا ھوٸی گیا۔بچےبچے کی پتہ ژاکہ 14 اگست آزادی ناں دیہاڑہ ژا۔سکول گشنےوالیاں بچیاں کی تے چھوڑا کہار نے اندر وی ھک ترے سال نے بچے کی وی پتہ ژا کہ 14اگست والےدن چنڈے نے رنگے نے چیڑے لاٸی ناں۔ اس کی وی پاکستانی چنڈے نی پہچان ای۔سکول تے بنداے پر فر وی بچیاں نے اندر تڑپ تے اکھیاں نےوچ ھک چمک ای۔اپنے ملخے واسطے ۔حالانکہ اے بچے آزادی نے مطلب تےمفہوم تھیں وی نا واقف اے۔لیکن ملخے نی محبت انہاں نےاندر رچی بسی وی۔اور اس نا سارا سہرا تےصلہ میں ھزار اختلاف نے ھونیاں وی مرحوم جرنل ضیإالحق کی دیساں۔کہ پہلی دفعہ ماڑی یاد وچ 1980 توں بعد جشن آزادی زور و شور تےجوش و خروش نال منانا شروع ھویا سلام آباد نے اندر بڑی تقریب منعقد ھوٸی۔تیری وادی وادی گھوموں….اور جیوے جیوے پاکستان جٸے سدا بہار ملی نغمے اسے ویلے نیاں یادگیریاں آں۔ھن کہر کہر سجناں، گلی ملحے سجنے تے پتہ لگناں اساں وی کوٸی زندہ قوم ژاں۔اے ھن نسلاں در نسلاں چلنا رھسی۔
باٶ جی تساں وی ٹھیک آخنے آ۔پر کم بہوں اے بدایہہ شڑیا نے ناں۔
باجی ھور کیہڑا کم کٹیا سارے اے بدیہہ گٸے۔اے جتناں بدیہہ چنگاہ ژا۔دکھا ناں ساڑے بچپن نے ویلے یو کش کتھے ھونا سا۔نہ سکولاں وچ کوٸی پروگرام نہ باقی اداریاں وچ کوٸی سرگرمی اس ویلے ھونی سی۔اج کل بزاراں وچ گچھا تے ھک رونق لگی ھونی بلڈنگاں اپر چنڈے ،دکاناں اپر، گڈیاں اپر، سیکلاں موٹرسیکلاں اپر، کھوکھیاں تے ریڑیاں اپر چنڈے اے چنڈے نظر اشنے۔
باٶ جی سب کش تھیا پر ساڑے ملخے نا حال روزبروز خراب اے ھونا جلناں ھر طرف افراتفری، مہنگاٸی۔کوٸی قنون نا۔کوٸی سولہت نٸی۔
باجی کدے وچلی گل کراں ناں تے اساں سارے اے اس نے ذمہ دار ژاں۔ھر آدمی اس ملخے وچ اپنا حق جتانا تے منگناں پر اپنا فرض کوٸی وی نہ ادا کرناں۔
باٶ لوکاں کی کیہ آخنے آ کیہ کرن یو کم تے ھن حکومتاں نےاے ناں کہ او عوام کی کش دیہن۔
ایہہ تے باجی اصل مسلہ ژا ناں سارے اساں کننے نے چکرے وچ ژاں دینے واسطہ کوٸی نہ تیار۔ھن میکی اے دکھی کنا ناں الّلہ پاک میکی وی اس ملخ وچ اے سب کش دتا وا ناں۔اس ملخے وچے چنگی تعلیم لبھی ناں۔اج میں اٹھارویں سکیل ناں افسر آں۔گڈی بنگلہ دتا وا نے بچیاں نییاں فیساں وی دینے تے علاج معالجہ وی سارے ٹبرے ناں چنگے ھسپتالےوچ مفت آ۔سالیہ بعد چنگی پلی پنشن وی ھوٸی گیسی تے اکٹھے پیسے وی لبھی رھسن۔ اتناں کش اس ملخے اے میکی دتا وا تے دیسی وی۔ھن دسا کہ ھک مراعات یافتہ پاکستانی نی حیثیت نال میں اس ملخے کی بدلے وچ کیہہ دتا۔یا ماڑے توں پہلیاں جیہڑے ماڑی طرح آٸے انہاں اس ملخے کی کیہ دتا۔۔؟ سواۓ ڈیمانڈاں تے گلیاں تھیں ایہہ حال ساریاں نا آ۔اساں سارے لوک اگر حقوق نے نال نال اپنے فراٸض وی ادا کراں تے یوہ ملخ ساڑا جنت بنی گچھے۔ دوۓ اپر تنقید کرنا سغلا کم ھوناں کم کرناں تے ملک قوم واسطہ قربانی دینا اُخا کم آ۔اتھے نی اے نکّی جٸی مثال تساں کی دیاں او بُھنّوں چڑی تے تساں نے کرے تک میں آیا آں راہ نی حالت اشنیاں ڈٹھی کھوتا وی اس اپر سغلا نہ ٹری سکناں۔مکان ساڑے دکھا تری تری چالیہ چالیہ لکھ روپے انہاں اپر لگّے وے۔کٸی کروڑ کی وی کراس کرنے۔تے اساں کی اتنی وی توفیق نٸی کہ چار پنج پنج ھزار باھی تے یوہ راہ اے سدھا کرے شڑاں۔اے وی اساں کی حکومت اے کری تے دیسی.اشنیا راہ وچ ڈٹھا جاٸی جاٸی چوں پانی لیک پیا ھوناں۔کٸی جاں ژاں وچ ٹوٹی اے نٸی پانی ایویں پیا بغناں ۔کٸی غریباں کی لبنا اے نہ۔یوہ کم وی ھن حکومت آنی تے کرسی۔ادھے کم باجی ساڑے آپنے کرنے نے اے کوٸی ھور اساں کی اچھی تے نہ کری دینا۔گل لنبی ھوٸی گٸی اٹھا بزارے در جلٸے تے اس ماڑے پترییے کی وی کش کنی دیا تے میں وی نکیاں واستےکش چاٸی کناں۔انہاں کی تے جشن آزادی مناندیاں ناں۔
باٶ جی چاہ شاہ نیا پینے اینویں اے رانواں روعاں چلے گیسا؟
اچھہ بزارے عچ اے پی کنساں۔۔۔۔۔
۔(اگے وی چلسی آ.)
